Paul Schanzer

Cyfarwyddwr Dros Dro, Academi Wales

Mae gan Paul dros 25 mlynedd o brofiad ym maes datblygu arweinyddiaeth ar ôl ymuno â GIG Cymru fel ymarferydd datblygu yn ystod y 1990au.

Mae Paul wedi gweithio yn Academi Wales, Llywodraeth Cymru ers 2013. Yn ystod y cyfnod hwn, mae wedi arwain ar ddatblygu ar lefel llywodraethu, gweithredol a bwrdd ar draws y sector cyhoeddus a’r trydydd sector yng Nghymru
Ac yntau wedi datblygu fframweithiau asesu uwch dimau ar gyfer arweinwyr, mae Paul yn gysylltiedig â galluogi uwch dimau a byrddau. Eu helpu i adnabod y nodweddion, y dulliau a’r strategaethau sydd eu hangen ar sefydliadau i weithredu a chynnal perfformiad uchel sefydliadol.

Mae gan Paul ddiddordeb arbennig mewn archwilio cysyniadau sy’n ymwneud â dynameg unigolion, grwpiau a systemau a’u heffaith ar wneud penderfyniadau effeithiol ar lefel bwrdd. Ar ôl cwblhau’r ‘Board Level Dynamics Programme’ gyda’r Tavistock Institute, cyfrannodd bennod astudiaeth achos i ‘High Performing Boards – exploring the influence of unconscious behaviours for the Dynamics at Boardroom Level’ (A Tavistock Primer for Leaders, Coaches and Consultants), a gyhoeddwyd yn 2019 gan Routledge.

Dr Margaret Heffernan

Mae Margaret Heffernan yn entrepreneur, Prif Weithredwr ac awdur. Mae’n ysgrifennu llyfrau a blogiau, yn dysgu ac yn mentora prif weithredwyr ac uwch weithredwyr.

Fe’i ganwyd yn Texas, ei magu yn yr Iseldiroedd a’i haddysgu ym Mhrifysgol Caergrawnt. Gweithiodd i Radio’r BBC am bum mlynedd ble bu’n ysgrifennu, cyfarwyddo, cynhyrchu a chomisiynu llu o raglenni dogfen a dramâu. Yn ystod ei 8 mlynedd fel cynhyrchydd teledu, gwnaeth ffilmiau dogfen i Timewatch, Arena a Newsnight. Cynlluniodd ac uwch gynhyrchodd gyfres 13 rhan ar y Chwyldro Ffrengig i’r BBC ac A&E. Bu hefyd yn cynhyrchu fideos cerddoriaeth gyda Cherddorfa Siambr Llundain er mwyn codi arian i gronfa Libanus Unicef.

Ar ôl gadael y BBC, hi oedd yn rhedeg y gymdeithas fasnach IPPA, oedd yn cynrychioli buddiannau cynhyrchwyr ffilm a theledu annibynnol a chafodd ei disgrifio unwaith fel “y sefydliad lobïo mwyaf nerthol yn Lloegr.”

Yn 1994, dychwelodd i UDA ble bu’n gweithio ar ymgyrchoedd busnes cyhoeddus yn Massachusetts a gyda chwmnïau meddalwedd oedd yn ceisio llwyddo gyda chynnyrch amlgyfrwng. Datblygodd gynnyrch amlgyfrwng gyda Peter Lynch, Tom Peter, Standard & Poors a The Learning Company. Yna ymunodd â CMGI ble bu’n rhedeg, prynu a gwerthu busnesau mawr y rhyngrwyd, fel Prif Weithredwr InfoMation Corporation, ZineZone Corporation a’r iCASY Corporation. Cafodd ei henwi’n un o 100 Uchaf y Rhyngrwyd gan Silicon Valley Reporter yn 1999, un o’r 25 Uchaf gan gylchgrawn Streaming Media ac un o’r 100 uchaf o Brif Weithredwyr y Cyfryngau gan The Hollywood Reporter. Enillodd ei hymgyrch “Tear Down the Wall” yn erbyn AOL wobr arian SABRE am gysylltiadau cyhoeddus yn 2001.

Mae Margaret wedi cyhoeddi pum llyfr: mae 'The Naked Truth: A Working Woman’s Manifesto' (Wiley, 2004) am yrfaoedd merched. Mae 'Women on Top: How Female Entrepreneurs are Changing the Rules for Business Success' (Penguin 2007) yn dilyn y cynnydd mewn entrepreneuriaid benywaidd. Cyrhaeddodd ei thrydydd llyfr, 'Wilful Blindness' (Simon & Schuster 2011 a fersiwn ddiwygiedig yn 2019) restr fer Llyfr Busnes Gorau’r Flwyddyn y Financial Times/Goldman Sachs; yn ddiweddarach disgrifiodd yr FT y llyfr fel un o rai pwysicaf y ddegawd. Mae ei holl waith yn trafod pam a sut mae cwmnïau sy’n llawn gweithredwyr dawnus, llawn cymhelliad ac ymroddiad yn methu â darganfod problemau mawr neu ddal gallu arloesol deallusol llawn eu pobl. Mae 'A Bigger Prize' (Simon & Schuster 2014) yn trafod sut y gall unigolion a sefydliadau fod yn wirioneddol greadigol a chydweithrediadol: ble mae’r rhwystrau rhag llwyddo a sut i’w goresgyn. Yn 2015 cyhoeddodd TED 'Beyond Measure: The Big Impact of Small Changes' sy’n trafod rhinweddau diffiniedig sefydliadau sy’n gynaliadwy arloesol. Mae sgyrsiau TED Margaret wedi cael eu gwylio gan dros 9 miliwn o bobl.

Bu Margaret yn rhan o 'Changing the Rules' ar BBC Radio 4, a enillodd Wobr Bri’r Cyfryngau 2007. Mae hefyd wedi ysgrifennu a chyflwyno sawl rhaglen Ddadansoddi ar gyfer BBC Radio 4. Drwy Merryck & Co., mae’n mentora arweinwyr busnesau byd-eang. Mae addysgu yn Ysgol Reoli Prifysgol Caerfaddon ac wedi cael ei gwahodd i siarad mewn ysgolion busnes o gwmpas y byd, gan gynnwys Ysgol Fusnes Harvard, Ysgol Rotman, Ysgol Fusnes Llundain ac Ysgol Polisi Cyhoeddus Lee Kuan Yew. Mae hefyd yn darlithio’n eang mewn sefydliadau nor amrywiol â Banc Ffederal UDA, Accenture, Intel, Google, Microsoft, Roche, KLA-Tencor, State Street, Khosla Ventures, Standard Chartered Bank, Chrysler, J.P.Morgan Chase a Procter & Gamble. Mae hefyd yn ysgrifennu darnau’n achlysurol i’r Financial Times.

http://www.mheffernan.com/

Gemma Morgan

Hyfforddais yn Academi Filwrol Frenhinol Sandhurst a fi oedd y ferch gyntaf i ennill Cleddyf Carmen gan Ei Mawrhydi y Dywysoges Frenhinol, am berfformiad rhagorol fel swyddog ifanc. Rwy’n gyn-athletwr rhyngwladol, bûm yn gapten ar dîm lacrós Cymru gan gystadlu mewn tair pencampwriaeth Cwpan y Byd. Enillais wobr ‘Y Chwaraewr Mwyaf Gwerthfawr’ yn Ewrop ym Mhencampwriaeth 1997.

Fel siaradwr gwadd, ymgynghorydd a hyfforddwr, mae gen i 20 mlynedd o brofiad rhyngwladol o arwain a pherfformiad tîm yn y sectorau milwrol, busnes a chwaraeon elît. Rwy’n Gymrawd y Sefydliad Arwain a Rheoli. Mae fy ngwaith yn cynnwys hwyluso strategaethau ar lefel bwrdd, hyfforddi gweithredol gyda brandiau byd-eang a datblygu timau chwaraeon elît.

Rwy’n Llysgennad i Elusen ‘Help for Heroes,’ sy’n helpu Cyn-filwyr Lluoedd Arfog Prydain. Roeddwn wrth fy modd i gael bod yn rhan o raglen ddogfen y BBC ‘Gareth Malone and the Invictus Games Choir,’ a chydweithiais gydag Ei Fawrhydi y Tywysog Harry a Warner Brothers i hyrwyddo’r ffilm ‘Dunkirk.’ A minnau wedi dioddef o straen wedi trawma o ganlyniad i fy ngwasanaeth milwrol, rwy’n ymgyrchu i hyrwyddo gwell ymwybyddiaeth o iechyd meddwl mewn sefydliadau heddiw.

https://morganeight.com/

Jonathan Stebbings

Uwch Gynhyrchydd Rhaglenni, Olivier Mythodrama

Mae Jonathan wedi bod yn gweithio’n rhyngwladol fel hwylusydd, hyfforddwr, anogwr a siaradwr gwadd ers 1998. Mae’n gweithio gyda phrif weithredwyr a byrddau, yn ogystal â graddedigion a staff y rheng flaen ar gyfer sefydliadau fel Barclays, BNP Paribas, Goldman Sasch, BNY Mellon, Aviva, HSBC, Hachette, Cisco, Freshfields, S&P Global, 3M, Stanley Black & Decker, Allied Domecq a Toyota.

Mae’n canolbwyntio ar effaith bersonol (gan gynnwys gwaith corff a llais), cyfathrebu unigol a sefydliadol, rheoli ac arwain, ac arloesedd a chreadigrwydd.

Mae gan Jonathan MA mewn Llenyddiaeth Saesneg ac mae wedi addysgu Shakespeare a drama. Mae ganddo hefyd gefndir masnach eang, ar ôl gweithio fel cyfreithiwr masnach yn Llundain a Rhydychen, ac i ICI.

Mae ganddo TAR, mae’n Uwch-ymarferydd NLP ac yn Ymarferydd mewn Therapi Llinell Amser a Hypnotherapi. Mae wedi ei ardystio mewn MBTI, SDI, Theori Ymwybyddiaeth o Berthnasoedd a Phroffil Rheoli Timau TMSFO a Phroffil Ymgyfarwyddo â Chyfleoedd QO2.

Mae wedi bod yn brif gyflwynydd gydag Olivier Mythodrama™ ers 2004.

https://www.oliviermythodrama.com/

Fons Trompenaars

Fons yw’r prif awdurdod ar reoli trawsddiwylliannol. Mae wedi treulio dros 30 mlynedd yn helpu arweinwyr Fortune 500 i reoli a datrys eu problemau busnes a diwylliannol er mwyn cynyddu effeithiolrwydd a pherfformiad byd-eang, yn enwedig ym meysydd globaleiddio, cydsoddi a chaffael, adnoddau dynol a datblygu arweinyddiaeth. Ers 1997, caiff Fons Trompenaars ei gydnabod yn un o’r meddyliau gorau wrth gysylltu gwahanol ddiwylliannau mewn busnes yn Thinkers50 ac yn 2017 cafodd ei dderbyn i Oriel Anfarwolion Thinkers50. Mae wedi gwerthu dros hanner miliwn o lyfrau mewn dros 10 o ieithoedd, fel 'Riding the Waves of Culture' (3ydd argraffiad 2012), cyfrol lwyddiannus iawn sy’n dweud bod meddwl am benbleth yn hanfodol wrth wneud penderfyniadau mewn cyd-destun rhyngddiwylliannol.

Mae gan Trompenaars Hampden-Turner (sydd hefyd wedi ei enwi ar ôl ei gyd-awdur rheolaidd Charles Hampden-Turner) swyddfeydd yn Amsterdam sydd â rhwydwaith fyd-eang ac mae’n gweithredu bas data mwyaf y byd ym maes rheoli rhyngddiwylliannol. Yn seiliedig ar y data hwn, yn ddiweddar cyflwynodd Fons ap newydd 'Culture for Business' yn TEDxAmsterdam ac mae wedi ychwanegu at hyn dros y blynyddoedd gydag ap Gender and Generation. Nod yr ap yw bod pobl yn deall gwreiddiau gwahanol ddiwylliannau’n well ac yn cael cyngor ar sut i wneud busnes mewn gwledydd eraill.

https://www2.thtconsulting.com/about/people/fons-trompenaars/