Nazir Afzal OBE

Bu Nazir Afzal OBE yn Brif Erlynydd y Goron yng Ngogleddorllewin Lloegr ac yn fwy diweddar, bu’n Brif Weithredwr Cymdeithas y Comisiynwyr Heddlu a Throseddu. Yn ystod ei yrfa dros 24 mlynedd, bu’n erlyn rhai o achosion uchaf eu proffil yn y wlad, ac yn cynghori ar nifer o bynciau cyfreithiol cenedlaethol gan gynnwys Trais yn Erbyn Menywod a Merched,cam-drin plant yn rhywiol a thrais ar sail anrhydedd.

Roedd ei erlyniadau o’r gang a oedd yn paratoi plant ar gyfer rhyw yn Rochdale, y cyflwynydd BBC Stuart Hall a channoedd o rai eraill yn arloesol gan ysgogi’r gwaith sydd wedi trawsnewid trefniadau amddiffyn plant. Mae ef hefyd yn Gynghorydd Cenedlaethol i Lywodraeth Cymru ar Drais ar Sail Rhywedd. Yn fwy diweddar, ymunodd â Chronfa Arloesedd Google ar gyfer gwrth-eithafiaeth.

Mae wedi derbyn nifer o anrhydeddau. Yn 2005, dyfarnwyd OBE iddo am ei waith gyda Gwasanaeth Erlyn y Goron a’i waith gyda chymunedau lleol. Cafodd yr anrhydedd hefyd o fod yr unig gyfreithiwr erioed i erlyn achos gerbron y Frenhines.

Tony Bovaird

Mae Tony Bovaird yn Athro Emeritws Rheolaeth a Pholisi Cyhoeddus yn INLOGOV, Prifysgol Birmingham, DU ac yn Gyfarwyddwr y sefydliad dielw Governance International. Mae ei ymchwil yn ymwneud â rheoli strategaeth a pherfformiad yn y sector cyhoeddus, gwerthuso gwasanaethau cyhoeddus a chyd-gynhyrchu gan ddefnyddwyr a chymunedau. Mae ei gleientiaid yn cynnwys y Comisiwn Ewropeaidd, OECD, Senedd y DU, Swyddfa’r Cabinet a nifer o lywodraethau rhyngwladol ac awdurdodau lleol.

Emmanuel Gobillot

Wedi’i ddisgrifio fel ‘y gwrw arweinyddiaeth cyntaf i genhedlaeth MySpace’ a’r ‘llais mwyaf arloesol mewn arweinyddiaeth heddiw’, mae Emmanuel wedi gweithio gyda sefydliadau sy’n amrywio o Astra Zeneca i Zurich Financial Services drwy Google a’r Cenhedloedd Unedig. Ers mwy na 15 mlynedd, mae ei ymyriadau wedi canolbwyntio ar greu’r gallu mewn sefydliadau i ddarparu canlyniadau drwy arweinyddiaeth o’r radd flaenaf. Mae hefyd yn gyd-sylfaenydd y cwmni ymgynghori Collaboration Partners sy’n arbenigo mewn helpu sefydliadau i gydweithio’n well.

Mae’n un o siaradwyr arweinyddiaeth prysuraf Ewrop; ef yw awdur ‘The Connected Leader’, llyfr a mynd mawr arno yn y DU a’r UD a gyhoeddwyd gan Kogan Page, a ‘LeaderShift’ a ‘Follow the Leader’. Cafodd ei lyfr diweddaraf, ‘Disciplined Collaboration’, ei gyhoeddi gan Urbane yn 2016. Mae ei lyfrau wedi’i sefydlu fel un o’r meddylwyr mwyaf blaenllaw ar fodelau.

Dr Margaret Heffernan

Mae Margaret yn entrepreneur ac yn awdur pum llyfr. Mae dros saith miliwn o bobl wedi gweld ei sgyrsiau TED. Hi yw arweinydd Rhaglen Arweinyddiaeth Gyfrifol y Forward Institute, a thrwy Merryck & Co., mae hi’n mentora prif weithredwyr ac uwch swyddogion gweithredol nifer o sefydliadau mawr byd-eang. Mae ganddi ddoethuriaeth er anrhydedd o Brifysgol Caerfaddon ac mae’n parhau i ysgrifennu i’r Financial Times a’r Huffington Post.

Sophie Howe

Cafodd Sophie ei phenodi'n Gomisiynydd cyntaf Cenedlaethau'r Dyfodol Cymru ym mis Chwefror 2016. Ei rôl yw gweithredu fel gwarcheidwad buddiannau cenedlaethau'r dyfodol yng Nghymru, a chefnogi'r cyrff cyhoeddus a restrir yn Neddf Llesiant Cenedlaethau'r Dyfodol (Cymru) 2015 i weithio tuag at gyflawni'r nodau llesiant.

Cyn y rôl hon, Sophie oedd Dirprwy Gomisiynydd Heddlu a Throseddu cyntaf De Cymru. Yn y rôl hon, bu'n arwain rhaglenni i fynd i'r afael â throseddu treisgar a thrais yn erbyn menywod a merched, gan ganolbwyntio ar ymyrraeth gynnar a gweithio mewn partneriaeth. Diwygiodd raglenni ar gamddefnyddio sylweddau a rheoli troseddwyr a negydodd y rhaglen waith a rennir gyntaf rhwng Iechyd Cyhoeddus Cymru a Heddlu De Cymru.

Mae Sophie hefyd wedi gweithio fel Cynghorwr Arbennig i'r Llywodraeth gan roi cyngor polisi a gwleidyddol ar gymunedau, llywodraeth leol, diogelwch cymunedol, tai, adfywio a chydraddoldeb.

Gyda chefndir mewn cydraddoldeb ac amrywiaeth ar ôl rheoli'r adran gyfreithiol yn y Comisiwn Cyfle Cyfartal ac yna fel cynghorwr polisi yn y Comisiwn Cydraddoldeb a Hawliau Dynol, cadeiriodd ac ysgrifennodd Sophie adroddiad Panel Arbenigwyr Comisiwn y Cynghorwyr ar gynyddu amrywiaeth mewn Llywodraethau Leol.

Bu Sophie'n gynghorydd Sir yng Nghaerdydd - y Cynghorydd ieuengaf yng Nghymru ar ôl cael ei hethol yn 21 oed. Yn ystod ei naw mlynedd fel Cynghorydd bu'n Ddirprwy Arweinydd yr Wrthblaid am gyfnod, yn ogystal ag aelod o'r Pwyllgor Craffu Plant a Phobl Ifanc.

Ar hyn o bryd mae'n aelod o Bwyllgor Cymru y Comisiwn Cydraddoldeb a Hawliau Dynol ac yn Cadeirio’r Rhwydwaith Sefydliadau ar gyfer Cenedlaethau’r Dyfodol . Mae yn byw yng Nghaerdydd hefo’i gwr Ceri a phump o blant.

Julie James AC

Nes iddi gael ei hethol yn Aelod Cynulliad dros Orllewin Abertawe, roedd Julie yn gyfreithiwr amgylcheddol a chyfansoddiadol blaenllaw. Cyn hynny, roedd yn brif weithredwr cynorthwyol yng Nghyngor Abertawe. Treuliodd y rhan fwyaf o’i gyrfa gyfreithiol mewn Llywodraeth Leol, yn gweithio fel cyfreithiwr polisi gyda Bwrdeistref Camden yn Llundain cyn dychwelyd i Abertawe i weithio i Gyngor Sir Gorllewin Morgannwg ac yna i Gyngor Dinas a Sir Abertawe.

Ers cael ei ethol, mae Julie wedi bod yn aelod o’r Pwyllgor Materion Cyfansoddiadol a Deddfwriaethol, y Pwyllgor Menter a Busnes a’r Pwyllgor Amgylchedd a Chynaliadwyedd. Cyhoeddodd Julie’r adroddiad ‘Dylanwadu ar y broses o foderneiddio polisi caffael yr Ewrop’ fel Cadeirydd Grŵp Gorchwyl a Gorffen ar Gaffael y Pwyllgor Menter a busnes. Eisteddodd Julie hefyd fel Cadeirydd Grŵp Gorchwyl a Gorffen y Pwyllgor Amgylchedd a Chynaliadwyedd ar y Polisi Pysgodfeydd Cyffredin.

Penodwyd Julie James yn Ddirprwy Weinidog Sgiliau a thechnoleg ym mis Medi 2014. Ym mis Mai 2016 penodwyd Julie yn Weinidog Sgiliau a Gwyddoniaeth. Penodwyd Julie yn Arweinydd y Tŷ a’r Prif Chwip ar 3 Tachwedd 2017. Ar 13 Rhagfyr 2018 Penodwyd Julie yn Weinidog dros dai a llywodraeth leol.

Rainer Kattel

Mae Rainer Kattel yn athro ac yn ddirprwy gyfarwyddwr y Sefydliad Arloesi a Phwrpas Cyhoeddus, Coleg Prifysgol Llundain. Mae wedi cyhoeddi’n eang ar bolisi arloesedd, sut i lywodraethu hynny a materion rheoli penodol. Mae ei ddiddordebau ymchwil hefyd yn cynnwys arloesedd yn y sector cyhoeddus, trawsnewid digidol ac arianoliad (financialization).

Mae ei lyfrau diweddar yn cynnwys 'The Elgar Handbook of Alternative Theories of Economic Development' (golygwyd gyda Erik Reinert a Jayati Gosh; Elgar, 2016), 'Financial Regulations in the European Union' (golygwyd gyda Jan Kregel a Mario Tonveronachi; Routledge, 2016), 'Innovation Bureaucracy' (gyda Wolfgang Drechsler a Erkki Karo; Yale, i’w gyhoeddi yn 2020), ac adran arbennig ar bolisi arloesedd a galluoedd dynamig sy’n canolbwyntio ar gyflawni yn y sector cyhoeddus yn 'Industrial and Corporate Change' (golygwyd gyda Mariana Mazzucato; 2018).

Yn 2013, dyfarnwyd Gwobr Wyddoniaeth Genedlaethol Estonia iddo am ei waith ar bolisi arloesedd.

Catherine Mangan

Mae gan Catherine ddiddordeb ymchwil arbennig mewn cyflawni newid o fewn y sector cyhoeddus. Mae ei meysydd diddordeb yn cynnwys integreiddio gofal iechyd a chymdeithasol, datblygu gweithlu’r dyfodol ac arweinyddiaeth ym maes gwasanaethau cyhoeddus. Mae Catherine yn gyd-gynullydd modiwl arweinyddiaeth gwasanaethau cyhoeddus i raglenni Meistr a gradd prentisiaeth yr Adran mewn Rheolaeth Gyhoeddus a Gweinyddiaeth Gyhoeddus.

Mae hi hefyd yn gyd-gynullydd rhaglenni ar integreiddio gofal iechyd a chymdeithasol a rheolaeth gyhoeddus ryngwladol. Mae Catherine yn datblygu ac yn darparu rhaglenni arweinyddiaeth gan gynnwys Rhaglen Datblygu Graddedigion Cenedlaethol, rhaglen Darpar Gyfarwyddwyr Iechyd Cyhoeddus a’r rhaglen Arweinyddiaeth Gyflawn i ddarpar brif weithredwyr. Mae hi’n cynnal ymchwil ym maes gofal cymdeithasol ac yn arbennig y berthynas rhwng gwahanol rannau’r system a sut mae hynny’n effeithio ar ganlyniadau i ddefnyddwyr gwasanaethau a’u teuluoedd. Mae Catherine yn goetsiwr gweithredol cymwys ac mae’n ysgrifennu erthyglau yn rheolaidd i newyddiaduron academaidd a’r wasg broffesiynol.

Shan Morgan

Ar ôl ymgymryd ag amrywiaeth eang o rolau o fewn y gwasanaeth sifil am nifer o flynyddoedd, daeth Shan yn Llysgennad ei Mawrhydi i’r Ariannin a Paraguay yn 2008 cyn cael ei phenodi’n ddirprwy gynrychiolydd parhaol UKRep ym mis Gorffennaf 2012, gan gynrychioli’r DU ar Bwyllgor Cynrychiolwyr yr UE o’r Aelod-wladwriaethau (Coreper I).

Ym mis Chwefror 2017, ymgymerodd Shan â’i swydd fel Ysgrifennydd Parhaol Llywodraeth Cymru, lle mae’n arwain Gwasanaeth Sifil Llywodraeth Cymru wrth gyflawni blaenoriaethau Gweinidogion, gan reoli cyllideb o £15 biliwn.

Nick Richmond

Mae gan Nick frwdfrydedd mawr dros gynllunio gweithleoedd ffyniannus trwy greu gwaith ystyrlon i ffurfio sefydliadau iach sy’n perfformio’n dda. Mae ef wedi gweithio fel ymgynghorydd sefydliadol ar draws nifer o sectorau dros y 12 mlynedd diwethaf. Mae Nick yn cyfrannu’n frwd at y gymuned cynllunio a datblygu sefydliadol fel un o Gyfarwyddwyr Tricordant, ac fel Cadeirydd Fforwm Cynllunio Sefydliadol Ewrop. Mae e’n defnyddio dulliau arloesol gan gynnwys Lego® Serious Play® i helpu arweinwyr a sefydliadau ffynnu mewn cyd-destunau cymhleth.

Ian Robertson

Mae Ian Robertson yn gyd-gyfarwyddwr y Sefydliad Iechyd Ymennydd Byd-eang (www.gbhi.org), yn Athro Emeritws yng Ngholeg y Drindod Dulyn, yn Wyddonydd Hybarch ym Mhrifysgol Texas yn Dallas ac yn Athro Gwadd yng Ngholeg Prifysgol Llundain.

Mae e’n arbenigwr rhyngwladol ar gysylltiadau meddwl-ymennydd mewn anhwylderau emosiynol ac anhwylderau’r ymennydd. Mae ef hefyd wedi ymgymryd ag uwch swyddi ym mhrifysgolion Columbia, Caergrawnt a Toronto. Fel niwrowyddonydd a seicolegydd clinigol hyfforddedig, mae ymchwil Ian yn ceisio pontio’r bwlch rhwng gwyddoniaeth yr ymennydd, seicoleg dynol a’r heriau personol y mae pob un person ar y blaned yn eu hwynebu o bryd i’w gilydd.

Mae nifer o’i lyfrau wedi’u cyfieithu a’u hadolygu gan gynnwys 'The Stress Test', 'Mind Sculpture', 'The Mind’s Eye', 'Stay Sharp' and 'The Winner Effect', a chyfeirir yn eang atynt ledled y byd. Mae ei flogiau a’i negeseuon trydar poblogaidd i’w gweld ar ianrobertson.org a @ihrobertson.

Sharon Turnbull

Mae Sharon yn arbenigo mewn datblygu arweinyddiaeth annibynnol, ac mae’n academydd sy’n cyhoeddi ac yn cyfrannu yn y maes arwain, newid sefydliadol, a datblygu gweithredol byd-eang ers blynyddoedd lawer. Mae wedi gweithio gydag arweinwyr o ystod eang o sectorau o bedwar ban byd i’w cefnogi hwy a’u sefydliadau i ffynnu yn y byd cyfnewidiol hwn.

Mae wedi addysgu mewn nifer o ysgolion busnes yn y DU a thramor, ac wedi cyd-ysgrifennu tri llyfr. Mae ganddi ddiddordeb yn y ffordd y gall trawsffurfiad personol a sefydliadol atgyfnerthu ei gilydd, ac yn y berthynas bwysig rhwng arwain, twf personol, cynhyrchaeth sefydliadol a’r cyfrifoldeb am gymdeithas.