Peter Kennedy MA, Siartredig FCIPD

Cyfarwyddwr – AD a Gwasanaethau Corfforaethol, Llywodraeth Cymru

 Mae Peter ar Fwrdd Llywodraeth Cymru yn rhinwedd ei swydd fel Cyfarwyddwr – AD a Gwasanaethau Corfforaethol. Ymunodd Peter â'r sefydliad yn 2004 ar ôl gweithio am sawl blwyddyn yn y Weinyddiaeth Amddiffyn; mae'n weithiwr adnoddau dynol proffesiynol gyda phrofiad blynyddoedd lawer o adnoddau dynol gweithredol a strategol ynghyd â phrofiad o Iechyd a Diogelwch, Rheoli Cyfleusterau a Chynllunio Argyfwng. 

Mae gan Peter gyfrifoldebau ychwanegol fel Prif Noddwr Cyrff a Noddir gan Lywodraeth Cymru ac fel yr Uwch Berchennog Risg Gwybodaeth. Mae Peter hefyd yn Gadeirydd Pwyllgor Pobl yr Eglwys yng Nghymru yn rhinwedd anweithredol.

Treuliodd Peter naw mlynedd yn yr Awyrlu Brenhinol mewn rolau cynnal a chadw awyrennau a hyfforddiant technegol.

Mae Peter yn byw yn Ninas Powys, mae’n briod â Jenny, ac mae ganddo ddau o blant a thair wyres.   

Sheeren Williams MBE OStJ DL

Prif Weithredwr, Comisiwn Ffiniau a Democratiaeth Leol Cymru ac Ysgrifennydd Comisiwn Ffiniau Cymru

Mae Sheeren Williams MBE OStJ DL ar hyn o bryd yn Brif Weithredwr Comisiwn Ffiniau a Democratiaeth Leol Cymru (LDBCW) ac yn Ysgrifennydd Comisiwn Ffiniau Cymru (BCW). Yn ddiweddar, bu’n arwain ar gwblhau rhaglen adolygu etholiadol ar gyfer Cymru gyfan sydd wedi arwain at y newidiadau mwyaf i drefniadau etholiadol llywodraeth leol mewn dros ugain mlynedd, ac ar hyn o bryd mae’n goruchwylio’r Adolygiad o Etholaethau’r Senedd a fydd yn lleihau nifer yr ASau yng Nghymru i 32. Cyn hynny, bu’n gweithio ym myd llywodraeth leol am bron i ddegawd ar draws Awdurdodau Lleol Casnewydd a Sir Fynwy fel y Rheolwr Cymunedau Cysylltiedig. A chyn hynny hyd yn oed, bu’n gweithio fel Cydlynydd Cydlyniant Cymunedol Rhanbarthol Dwyrain Gwent. Roedd y tîm yr oedd hi’n ei reoli yn gyfrifol am gyflawni blaenoriaethau strategol, gan gynnwys Mudo, Atal Eithafiaeth Dreisgar, Cydraddoldebau a Chydlyniant Cymunedol.

Dros yr 16 mlynedd diwethaf, mae wedi gwirfoddoli mewn nifer o rolau yn y trydydd sector yn ogystal ag i gyrff statudol ac mae hi ar hyn o bryd yn un o ymddiriedolwyr Cymdeithas Ambiwlans Sant Ioan Cymru a Sefydliad Materion Cymreig. Yn 2010, derbyniodd Wobr Cydnabod Cyrhaeddiad Llywodraeth Cymru am wasanaeth i Gydlyniant Cymunedol, a hynny o law Prif Weinidog Cymru ar y pryd, y Gwir Anrhydeddus Carwyn Jones AC. Yn 2017, dyfarnwyd iddi MBE er anrhydedd am wasanaeth i’r gymuned ac yn 2018 cafodd ei chydnabod gan y Gymdeithas er Hyrwyddo Ysgolion Busnes Colegol (AACSB) yn eu Her Arweinwyr Dylanwadol, sy’n anrhydeddu cyn-fyfyrwyr rhyngwladol o ysgolion busnes achrededig AACSB. Ar ôl cael ei derbyn fel Swyddog Urdd Sant Ioan ym mis Chwefror 2020, fe’i penodwyd yn Ddirprwy Raglaw yng Ngwent ym mis Tachwedd 2021.

Yn ei hamser rhydd, mae’n eistedd fel ynad ar fainc Gwent ac mae’n llywodraethwr ar ddwy ysgol gynradd Gymraeg yng Nghasnewydd. Yn fwy diweddar, oherwydd yr holl amser y mae hi’n ei dreulio yn y clwb rygbi y mae ei dau fab ifanc yn chwarae iddo, mae hi bellach yn aelod o Bwyllgor Timoedd y Plant Iau a Phobl Ifanc y Clwb.

Yr Athro Eugene Sadler-Smith

Athro Ymddygiad Sefydliadol yn Ysgol Fusnes Surrey, Prifysgol Surrey

Mae Eugene Sadler-Smith yn Athro Ymddygiad Sefydliadol yn Ysgol Fusnes Surrey, Prifysgol Surrey. Ei ddiddordebau ymchwil yw hubris (mewn arweinyddiaeth) a greddf (wrth wneud penderfyniadau). Ymhlith ei gyhoeddiadau diweddaraf mae Hubristic Leadership (SAGE, 2018) ac Intuition in Business (Oxford University Press, 2023). Cyn dod yn academydd, bu'n gweithio yn y diwydiant nwy.

Prifysgol Surrey (allanol)

David Halpern CBE

Prif Weithredwr, Tîm Dirnadau Ymddygiadol

David Halpern CBE yw Prif Weithredwr y Tîm Dirnadau Ymddygiadol. David sydd wedi arwain y tîm ers ei sefydlu yn 2010. Cyn hynny, David oedd Cyfarwyddwr Ymchwil cyntaf y Sefydliad Llywodraeth, a rhwng 2001 a 2007 fe oedd Prif Ddadansoddwr Uned Strategaeth y Prif Weinidog. Penodwyd David hefyd yn Ymgynghorydd Cenedlaethol What Works ym mis Gorffennaf 2013, swydd a ddaliodd tan 2022 lle arweiniodd ymdrechion i wella'r defnydd o dystiolaeth ar draws y llywodraeth.

Cyn gweithio i’r llywodraeth, treuliodd David gyfnod yng Nghaergrawnt a daliodd swyddi yn Rhydychen a Harvard. Mae wedi ysgrifennu nifer o lyfrau a phapurau ar feysydd yn ymwneud â dirnadau ymddygiadol a lles, gan gynnwys Social Capital (2005), The Hidden Wealth of Nations (2010), Online Harms and Manipulation (2019) a chyd-ysgrifennodd yr adroddiad MINDSPACE. Yn 2015, ysgrifennodd David lyfr am y tîm o'r enw Inside the Nudge Unit: How Small Changes Can Make a Big Difference.

Dyfarnwyd CBE i David yn Anrhydeddau'r Flwyddyn Newydd ym mis Ionawr 2022 am ei waith i Wasanaeth Cyhoeddus fel Ymgynghorydd Cenedlaethol What Works.

Zoe Sweet

Y Weinyddiaeth Gyfiawnder

Zoe Sweet yw Cyfarwyddwr Rhanbarthol Effeithiolrwydd Sefydliadol, Grwp Pobl, yn y Weinyddiaeth Gyfiawnder. Mae'r maes hwn yn canolbwyntio ar effeithiolrwydd ledled y system drwy ddefnyddio datblygiad sefydliadol, dylunio sefydliadau, gwelliant parhaus a newid ymddygiad. Gydag ugain mlynedd o brofiad ym maes pobl, arweinyddiaeth a datblygiad sefydliadol, mae gan Zoe ddiddordeb arbennig yn yr heriau sy'n wynebu arweinwyr wrth adeiladu 'sefydliadau iach'.

Fel ymarferydd profiadol, mae Zoe yn ymchwilio i PhD sy'n archwilio profiadau arwain mewn perthynas â chaledwch meddyliol a gwydnwch. Ar hyn o bryd, mae'n eistedd ar Fwrdd Cynghori’r Ganolfan Ryngwladol ar gyfer Ymchwil a Datblygu Gwydnwch Meddyliol, gan archwilio defnydd ac effeithiau byd-eang, ac mae'n awdur cyhoeddedig. Yn fwyaf nodedig, 'Developing Resilient Organizations (2014), 'Developing Mental Toughness' (2015) ac yn fwyaf diweddar ‘Public Value – Purpose, Passion and Perseverance: creating public value through public sector leadership’ (Routledge, 2019).

Susie Ventris-Field

Prif Weithredwr, Canolfan Materion Rhyngwladol Cymru

Mae Susie, sydd ag angerdd dros gynnwys pobl mewn rhyngwladoldeb, yn arwain WCIA, ac mae hi wedi bod yn gweithio i’r mudiad ers cymryd rhan fel gwirfoddolwr yn 2013. Fel rhan o’i gyrfa yn y trydydd sector, mae Susie wedi gweithio ym meysydd cydraddoldeb rhywiol, addysg a chynhwysiant yng Nghymru, Lloegr, De Corea ac Eritrea.

"Rwy’n cael fy ysbrydoli’n drwy’r adeg gan y bobl yng Nghymru sy’n rhoi eu hamser, eu hegni a’u profiad i greu byd tecach a mwy heddychlon. Yn WCIA, rydym eisiau adeiladu ar yr enghreifftiau gwych hyn, a sicrhau bod mwy o bobl yn cymryd rhan, fel bod Cymru yn gallu parhau i gystadlu â’r goreuon fel cenedl sy’n gyfrifol ar lefel fyd-eang."

Thimon de Jong

Arbenigwr rhagweld strategol a siaradwr angerddol, deniadol

Wrth ddefnyddio newid cymdeithasol-seicolegol a diwylliannol i ddiwallu anghenion strategol gwahanol ddiwydiannau, nid yw'n fawr o syndod bod Thimon wedi dod yn un o siaradwyr mwyaf poblogaidd ei genhedlaeth.

Dros y deng mlynedd diwethaf mae Thimon wedi gweithio fel prif siaradwr a choetsiwr arwain ar gyfer sefydliadau fel Morgan Stanley, Microsoft, HP, Ikea, Vodafone, Tetra Pak, Novartis, Kellogg, Merck a Luxottica.

Ar ôl astudio astudiaethau diwylliannol a busnes rhyngwladol, ysgrifennodd thesis ei radd Meistr ar isddiwylliant a dechreuodd ei yrfa ym maes newyddiaduraeth.

Yn ei rôl fel prif olygydd platfform ieuenctid (cylchgrawn a gwefan), darganfu ei angerdd am ymchwil i bobl ryngddisgyblaethol a dechreuodd weithio fel ymchwilydd ieuenctid a chyfryngau ar gyfer Science of the Time a FreedomLab Future Studies. Yn 2007, cymerodd Thimon rôl cyfarwyddwr Mewnwelediadau a Strategaeth ar gyfer TrendsActive, asiantaeth dehongli tueddiadau rhyngwladol. Yn y rôl hon, teithiodd y byd yn ymgynghori a chyflwyno i nifer o gwmnïau rhyngwladol. Yn 2010, serennodd fel aelod o'r rheithgor yn Holland's Best Idea – sioe deledu oriau brig.

Yn 2011, cydgynhyrchodd raglen weithredol ar gyfer gwneuthurwyr penderfyniadau ym Mhrifysgol Utrecht ar y pwnc o ddefnyddio tueddiadau cymdeithasol-diwylliannol ar gyfer gwneud penderfyniadau strategol. Yn 2014, sefydlodd Whetston / strategic foresight, melin drafod ar ymddygiad dynol a newid cymdeithasol yn y dyfodol a'r effaith ar wneud penderfyniadau strategol.

Mae Thimon yn benderfynol nid yn unig o sôn wrth ei gynulleidfa am ymchwil, mewnwelediadau ac achosion busnes, mae hefyd am roi tecawês strategol iddyn nhw ar sut i ddefnyddio’r wybodaeth a helpu eu busnesau i dyfu.

Strategic Foresight - Whetston.com (allanol)

Phyllida Hancock

Uwch-gyfarwyddwr y Rhaglen, Olivier Mythodrama

Mae Phyllida yn Uwch Gyfarwyddwr Rhaglen gydag Olivier Mythodrama ac yn arwain rhaglenni Mythodrama i sefydliadau ar draws y sectorau preifat a chyhoeddus yn y DU a thramor. Mae hi hefyd yn rheoli rhaglen datblygu arweinyddiaeth ar gyfer cleient byd-eang mawr ac mae ganddi rôl gyswllt gyda sawl cleient arall.

Bu'n gweithio fel actores a chantores am 12 mlynedd, gan gynnwys dwy flynedd gyda'r Royal Shakespeare Company a sawl cynhyrchiad yn y West End. Bu hefyd yn aelod o sawl côr proffesiynol ac mae wedi cyfrannu at nifer o recordiau a theithiau.

Ym 1998, dechreuodd weithio fel hwylusydd o fewn sector cyhoeddus y DU yn cynllunio a chyflwyno gweithdai, a threuliodd ddeunaw mis yn arwain rhaglen cydraddoldeb, amrywiaeth a chynhwysiant ar draws y System Cyfiawnder Troseddol. Bu Phyllida yn ymgynghorydd am flynyddoedd lawer mewn cyfleuster 'Futurefocus' rhyngadrannol, gan weithio ar draws y llywodraeth ar gynllunio senarios a gweithio prosiect. Yn ogystal â'i gwaith gydag Olivier Mythodrama, mae hi'n gweithio fel hwylusydd llawrydd ar raglenni arweinyddiaeth a datblygu sefydliadol ar draws sectorau, gan ganolbwyntio’n arbennig ar sgiliau cyfathrebu a phresenoldeb.

Ymhlith cleientiaid Phyllida mae:

• Ysgol Fusnes Said
• Ysgol Fusnes Llundain
• Npower
• Cronfa'r Brenin
• BT Openreach
• Microsoft
• International Atomic Energy Association
• Johnson & Johnson
• Ysgol Fusnes Cass
• Aviva

Nazir Afzal OBE

Nazir Afzal OBE oedd Prif Erlynydd y Goron ar gyfer gogledd-orllewin Lloegr a chyn hynny bu’n Gyfarwyddwr yn Llundain. Fe oedd Prif Weithredwr Comisiynwyr Heddlu a Throseddu’r wlad ac, yn fwyaf diweddar, bu’n Gynghorydd Cenedlaethol i Lywodraeth Cymru.

Yn ystod gyrfa 30 mlynedd, mae wedi erlyn yr achosion amlycaf yn y wlad a chynghori ar nifer o rai eraill, ac arweiniodd yn genedlaethol ar sawl pwnc cyfreithiol gan gynnwys trais yn erbyn menywod a merched, cam-drin plant yn rhywiol, a thrais ar sail anrhydedd. Roedd ganddo gyfrifoldeb dros 100,000 o erlyniadau bob blwyddyn. Fe wnaeth ei erlyniadau o'r hyn a elwir yn ‘Rochdale grooming gang’ a channoedd o rai eraill dorri tir newydd a newidiodd dirwedd amddiffyn plant.

• Fe yw Canghellor newydd Prifysgol Manceinion.
• Mae’n Gadeirydd Coleg Addysg Bellach Neuadd Hopwood.
• Mae'n eistedd ar Sefydliad Annibynnol Safonau'r Wasg.
• Aelod annibynnol o Bwyllgor Diogelu a Moeseg Oxfam.
• Ymddiriedolwr Cymdeithas Partneriaid Diogelu.
• Mae'n eistedd ar Bwyllgor Moeseg Cenedlaethol Penaethiaid yr Heddlu.
• Fe'i penodwyd yn Gadeirydd annibynnol cyntaf erioed Asiantaeth Ddiogelu'r Eglwys Gatholig.
• Mae'n Gadeirydd yr Adolygiad Annibynnol o Ddiwylliant Brigâd Dân Llundain.
• Ymddiriedolwr Sefydliad WOW (Byd y Merched).

Mae ei gofiant 'The Prosecutor', a gyhoeddwyd yn 2020, yn cael ei addasu ar gyfer drama amlran Brydeinig ar hyn o bryd. Cyhoeddir ei lyfr newydd 'The Race to the Top' ym mis Medi 2022. Ei raglen 'Desert Island Discs' ar BBC Radio 4 oedd y drydedd raglen y gwrandawyd fwyaf arni yn 2021. Mae ei bodlediad 'Fear or Favour' wedi cael adolygiadau clodwiw.

Dr Andrew Goodall

Ysgrifennydd Parhaol, Llywodraeth Cymru

Cafodd Dr Andrew Goodall ei benodi i rôl Ysgrifennydd Parhaol Llywodraeth Cymru ym mis Tachwedd 2021. Mae’n arwain Gwasanaeth Sifil Llywodraeth Cymru i gyflawni blaenoriaethau’r Prif Weinidog ac yn gweithredu fel y Prif Swyddog Cyfrifyddu ar gyfer Llywodraeth Cymru. Cyn hyn, roedd yn Gyfarwyddwr Cyffredinol Iechyd a Gwasanaethau Cymdeithasol / Prif Weithredwr GIG Cymru, a hynny ers mis Mehefin 2014.

Mae Dr Goodall wedi bod yn Brif Weithredwr yn y GIG yng Nghymru ers 16 mlynedd. Mae ei swyddi blaenorol yn cynnwys Prif Weithredwr Bwrdd Iechyd Prifysgol Aneurin Bevan, swydd y bu ynddi ers dechrau'r Bwrdd Iechyd ym mis Hydref 2009 tan 2014 ar ôl ad-drefnu'r GIG i fodel integredig y Bwrdd Iechyd.

Yn ystod ei yrfa 30 mlynedd yn y GIG, mae Dr Goodall wedi dal swyddi cynllunio a gweithredol ar draws nifer o sefydliadau'r GIG ledled De Cymru yn ogystal â rolau cenedlaethol. Mae ganddo feysydd diddordeb penodol mewn gwella diogelwch, ansawdd a phrofiad cleifion; gweithio mewn partneriaeth a chydweithio ar draws Gwasanaethau Cyhoeddus; a darparu gwasanaethau rheng flaen trwy wella a moderneiddio gwasanaethau.

Mae gan Dr Goodall radd yn y gyfraith o Brifysgol Essex a PhD mewn Rheoli Gwasanaeth Iechyd o Ysgol Fusnes Caerdydd. Dyfarnwyd CBE i Dr Goodall yn Anrhydeddau Blwyddyn Newydd 2018 am ei wasanaethau i'r GIG a gwasanaethau cyhoeddus.

Jo Hicks

Ddirprwy Brif Swyddog Pobl ac yn Gyfarwyddwr Strategaeth, Arweinyddiaeth a Pherthyn, Weinyddiaeth Gyfiawnder

Ar hyn o bryd mae Jo Hicks yn Ddirprwy Brif Swyddog Pobl ac yn Gyfarwyddwr Strategaeth, Arweinyddiaeth a Pherthyn yn y Weinyddiaeth Gyfiawnder.

Gyda thros chwarter canrif o brofiad yn arwain ac yn sbarduno newid strategol ar draws sefydliadau mawr, mae Jo yn arbenigwr gweithlu, arweinyddiaeth a datblygu sefydliadol. Gyda chefndir yn y GIG a'r Llywodraeth, mae gan Jo gyfoeth o brofiad yn gweithio ar draws gwasanaethau cyhoeddus ar lefel leol a chenedlaethol.

Gyda chyfrifoldeb dros ddatblygu pobl, profiad a mewnwelediad y gweithlu a dylunio a chyflwyno strategaeth 'dyfodol gwaith' pobl, mae angerdd a sylw Jo bob amser wedi bod ar bobl.

Yn arweinydd cydweithredol gyda sylw ar ymgysylltu a phartneriaeth, mae Jo yn creu diwylliannau sy'n galluogi pobl i ffynnu. Mae Jo yn ddarparwr sydd â disgwyliadau uchel ohoni hi ei hun a'i thîm.

Mae Jo'n falch o fod yn Gymraes ac mae wedi cynrychioli ei gwlad fel uwch arweinydd yn Awstralia a'r Swistir. Mae Jo yn ymarferydd perfformiad uchel ac yn gyn-fyfyriwr o Ysgol Llywodraeth JFK, Harvard ac yn gymrawd CIPD.

Ian Bancroft

Prif Weithredwr, Cyngor Bwrdeistref Sirol Wrecsam

Dechreuodd Ian ar ei swydd fel Prif Weithredwr Cyngor Wrecsam ym mis Awst 2018. Am y pedair blynedd ar ddeg blaenorol, bu’n gweithio ar lefel uwch arweinyddiaeth o fewn sefydliadau gwasanaeth cyhoeddus mawr ym Manceinion Fwyaf, Glannau Mersi a gogledd-ddwyrain Cymru. Yn fwyaf diweddar, ers 2014, bu’n gweithio ar y lefel hon i Gyngor Sir y Fflint fel Prif Swyddog, gan arwain yn llwyddiannus y gwaith o ddatblygu a gweithredu nifer o raglenni strategol pwysig.

Mae Ian wedi ymrwymo i ddarparu gwasanaethau cyhoeddus a'i nod yw gweithio gyda phartneriaid, cymunedau lleol a thrigolion i adeiladu a chyflwyno gweledigaeth glir sy'n sicrhau canlyniadau rhagorol. Mae Ian wedi byw yn Wrecsam ers ugain mlynedd ac mae'n angerddol am y cyfleoedd positif presennol sydd gan Wrecsam a Chymru i’w cynnig a'r potensial ar gyfer y dyfodol.

Dr Neil Wooding CBE CCIPD

Cyfarwyddwr Gweithredol Diwygio'r Gweithlu, Swyddfa'r Cabinet

Mae Neil wedi treulio ei holl yrfa yn gweithio ym maes gwasanaeth cyhoeddus. Ar hyn o bryd, fe yw Cyfarwyddwr Gweithredol Diwygio'r Gweithlu yn Swyddfa'r Cabinet. Cyn hyn, roedd yn Brif Swyddog Pobl y Weinyddiaeth Gyfiawnder a’i brif genhadaeth oedd adlinio strwythur a dyluniad y sefydliad gyda'i ddiben craidd a moderneiddio'r swyddogaeth gyflog.

A chyn hynny hyd yn oed, bu Neil yn gweithio i Lywodraeth Cymru yn helpu i sefydlu Academi Wales ac fel Cyfarwyddwr y Gweithlu a Datblygu Sefydliadol ar gyfer y GIG yng Nghymru. Yn ystod ei yrfa, mae wedi gweithio ar draws sbectrwm gwasanaethau cyhoeddus gan adeiladu portffolio unigryw o brofiad ym maes newid, arweinyddiaeth ac arloesedd.

Ers yn 17 oed, mae wedi gweithio mewn swydd wirfoddol ac ar hyn o bryd fe yw cadeirydd Cyngor Gweithredu Gwirfoddol Cymru. Yn ystod ei yrfa, mae wedi cyhoeddi nifer o bapurau ar arweinyddiaeth a datblygu rheoli ac wedi treulio amser yn Ysgol Lywodraeth JFK yn datblygu dulliau newydd o ddysgu arweinyddiaeth. Wedi’i gydnabod yn rhyngwladol am ei arbenigedd, mae wedi gweithio yn Sgandinafia, yr Unol Daleithiau, Canada, India ac Affrica Is-Sahara i hyrwyddo newid trawsnewidiol. Mewn cyd-destun ehangach, rhwng 2001 a 2009, gwasanaethodd fel Comisiynydd Cydraddoldeb a Hawliau Dynol Cymru ac fe arweiniodd nifer o Ymchwiliadau'r Deyrnas Unedig i lafur rhan-amser a hawliau mudol a Hawliau Dynol. Yn ystod yr un cyfnod, roedd yn un o Ymddiriedolwyr Stonewall UK. Yn 2016, daeth yn Ymddiriedolwr Ymddiriedolaeth Sefydliad Banc Lloyds ac yn ddiweddar fe'i penodwyd yn Gyfarwyddwr Anweithredol ar Fwrdd Llywodraeth yr Alban.

Mae'n Gydymaith i'r Sefydliad Siartredig Personél a Datblygu a dyfarnwyd CBE iddo yn rhestr Anrhydeddau'r Flwyddyn Newydd yn 2022 am ei waith eithriadol ym maes Cydraddoldeb a Chyfiawnder Cymdeithasol.