Gweithgareddau

Mae’r Profiad Uwch Arweinyddiaeth yn cynnwys y gweithgareddau canlynol:

Sesiwn friffio

Dewch i gwrdd â chyd-gyfranogwyr ar y Profiad Uwch Arweinyddiaeth o bob rhan o Un Gwasanaeth Cyhoeddus Cymru a’r trydydd sector a dysgu beth sydd angen i chi ei wneud er mwyn cwblhau’r cydrannau diagnostig.

Diagnosteg

Byddwch yn ymgymryd â chyfres gynhwysfawr o ymarferion diagnosteg ar-lein, wedi’u datblygu gan Korn Ferry, wedi’u hanelu at archwilio ymddygiad personol ac arddulliau arwain, awyrgylch y tîm, perthnasau a deallusrwydd emosiynol.

Bydd y ddiagnosteg rydych chi wedi'i chwblhau yn cael ei dwyn ynghyd i roi dau adroddiad Arweinyddiaeth i chi, 'About Me' a 'How I Lead'.

Er mwyn i chi gael y gorau o'r Profiad, mae'n hanfodol eich bod yn gallu nodi o leiaf 3 o bobl yr ydych yn eu harwain (6-8 yn ddelfrydol). Gall hyn fod yn berthynas rheolwr llinell ffurfiol neu'n berthynas lle rydych chi'n gweithio gyda'ch gilydd mewn ffordd debyg. Byddwch hefyd yn dewis 1-2 reolwr llinell, yn ogystal â chyfoedion, eraill a chleientiaid/cwsmeriaid i gwblhau'r ddiagnosteg.

Sesiwn broffilio

Yn y sesiwn hon, byddwch yn cyfarfod ac yn gweithio gyda chyd-weithwyr eraill yn y gwasanaeth cyhoeddus ar y Profiad.

Byddwch yn archwilio'r modelau y tu ôl i'r ddiagnosteg fel y gallwch ddeall eich adroddiad pan fyddwch yn ei dderbyn. Bydd eich adroddiad yn rhoi cipolwg i chi i'ch helpu i baratoi ar gyfer eich sesiynau coetsio. Felly, mae'n hanfodol eich bod yn mynd i’r diwrnod proffilio.

Sesiynau coetsio 1 a 2

Mae'r sesiynau coetsio yn rhan hanfodol o'r Profiad. Mae eich coetsiwr wedi'i achredu ym mhob un o'r ddiagnosteg ond mae'n gweithredu fel coetsiwr, nid hwylusydd adborth.

Dyma lle gallwch chi archwilio'r camau rydych chi am eu cymryd mewn meysydd fel twf personol a thîm a datblygu arweinyddiaeth.

Byddwch chi a'ch hyfforddwr yn cytuno ar ddyddiadau ac amseroedd eich sesiynau coetsio.

Diwrnod dysgu ar waith

Yn y bore, byddwch chi a chyfranogwyr eraill a'u rheolwyr llinell yn dod ynghyd, i rannu eich dysgu a'ch profiadau, ac i ddathlu'r hyn rydych wedi'i gyflawni. Ar ôl cinio, bydd gweithdy datblygu i'ch cychwyn ar ran nesaf eich taith arweinyddiaeth.

Cyflwyno'ch cais

Mae’n rhaid i ymgeiswyr fodloni’r holl ofynion gorfodol yn gyntaf, gan gynnwys cytundeb y rheolwr llinell, ymrwymiad o ran presenoldeb ac addasrwydd ar gyfer y Profiad Uwch Arweinyddiaeth. 

Yna, bydd ceisiadau cymwys yn cael eu sgorio yn seiliedig ar gryfder y datganiad personol, a bydd aseswyr yn chwilio am dystiolaeth glir o addasrwydd ar gyfer uwch arweinyddiaeth, canlyniadau datblygu pwrpasol, parodrwydd i fyfyrio a derbyn adborth, a’r potensial i gymhwyso’r hyn a ddysgir er budd ehangach i’r sefydliad neu’r gwasanaeth cyhoeddus. 

Pan fydd nifer y ceisiadau yn uwch na nifer y lleoedd sydd ar gael, cynigir lleoedd i’r rhai y mae eu ceisiadau yn cynnig y dystiolaeth gryfaf yn erbyn y meini prawf. Fel rhan o’r broses benderfynu derfynol, ystyrir lledaeniad sefydliadol a chynrychiolaeth ddaearyddol. 

Felly, anogir ymgeiswyr i roi sylw manwl i’w ffurflen gais ac i roi ymatebion penodol, sy’n seiliedig ar dystiolaeth gadarn, ac sy’n dangos yn glir pam fod y profiad hwn yn addas iddynt ar y cam hwn o’u taith fel arweinydd.

Rheolwr Llinell

I gwblhau eich cais, mae angen i'ch rheolwr llinell ddarllen a llofnodi’r cytundeb rhaglensydd wedi’i atodi. Rhaid i’ch rheolwr llinell gytuno i’r pethau canlynol:

• Y cewch ymuno ym mhob un o sesiynau’r Profiad.
• Y byddant yn dod i’r digwyddiad Rhoi’r Dysgu ar Waith er mwyn cefnogi eich datblygiad parhaus
• Y bydd eich sefydliad, os byddwch yn tynnu'n ôl o'r rhaglen, yn talu'r gost lawn o £350 + TAW.

Ewch i’n tudalen cais am ragor o fanylion.

Ffurflen gais

Bydd y cyfnod ymgeisio yn cau ar 20 Tachwedd 2026; fodd bynnag, rydym yn cadw’r hawl i ddod â’r cyfnod ymgeisio i ben yn gynt os ydym yn derbyn nifer uchel o geisiadau. Sicrhewch eich bod yn cyflwyno eich cais cyn gynted â phosibl er mwyn osgoi siom.